تأخير عمل مراوح التبريد و حل لزيادة برودة المكيف

43 35

لايمكنك التصويت حتى الحصول على 20 نقطة على الأقل
إضغط هنا للإخفاء

ابراهيم 78 -140
قبل 6 سنه و 9 شهر

السلام عليكم ورحمة الله و بركاته

اللحين لي 3 أيام أنتظر يفتح السماح لي بتنزيل موضوع و على حظي وقفوا خاصية تنزيل الصور

كيف أشرح الموضوع بشكل مبسط لابد من وجود صور لسهولة الشرح

عموما ما جاء ببالي ان الصور موقفه

لكن الموضوع القادم انزل شرح باليوتيوب و اعطيكم الرابط افضل و اسهل

يكون فيديو أوضح

أختصار الموضوع

السيارات ذات المراوح الكهربائية

غالبا تكون المراوح مع المكيف تشتغل و تطفي ما تشتغل بشكل متواصل

و هذا سبب ضعف التبريد و السيارة واقفه لانه كل ما فصلت المراوح يضعف التبريد

حتى تشتغل مره اخرى و بعض أنواع السيارات ما تفصل المراوح مع المكيف

مثل التورس على سبيل المثال تبقى وحده شغاله بأقصى طاقه لها و صوتها عالي

لتحافظ على تبريد المكيف حتى بحال وقوف السيارة

أصحاب الكامري 2007 حتى 2011 الكمبروسرات بحساس وليس كلتش مثل السابقه

و بحال الكمبروسر خرب يولفون كمبروسر كامري 2002 القديمه

يقولون يبرد أكثر و السر بهذا الشيء ان عند التوليف و تشغيل المكيف

المراوح تبقى شغاله على طول ما تفصل مثل نظام كمبروسر الحساس

يعني هذا بفضل المراوح و ليس بفضل نوع الكمبروسر

و بالعكس الكمبروسر بحساس اريح للمكينه ولا يتغير عزم ولا صوت السيارة ولا شيء عند تشغيله

بعكس الكلتش يثقل العزم و يتغير الصوت و بحال التوليف غالبا تحصل عندك رجه وانت واقف

بالنسبة اذا ما شغلت المكيف فيه سيارات مثل الشفر الكابرس و اللومينا 6 سلندر

المراوح ما تشتغل الا على درجة حرارة 108 و هذا كثير

و هذا سبب ان بعض اصحاب الشفر يشتكون من ارتفاع الحراره بالمرتفعات

لأن المراوح ما تشتغل الا بعد ما توصل لأقصى حراره فيها و مع الدعس و الطلوع

ما عاد تلحق تبرد المراوح بعكس لو المراوح تشتغل على سرعة أقل يكون باقي الأجزاء الداخليه

للمكينه بحراره معتدله و مع المراوح تساعد على الحفاظ على استقرار الحراره

لكن لو تتركها شد بلد و توصل 108 بعد دقايق الأجزاء الداخليه للمكينه تصبح ساخنه

و المراوح ما تقدر تبردها الا بالوضع الطبيعي لو السيارة ماشيه بخط مستقيم او واقفه

لكن بالمرتفعات ما عاد تلحق

اما الكابرس 8 سلندر غالبا يبرمجون المراوح يخلونها تشتغل على 90 و أحيانا اقل

فرق بين 90 و 108 ولكن 6 سلندر مالها برمجه

سابقاً كنت أعاني من الشيء هذا باللومينا اضطر أشغل المكيف حتى لو الجو حلو

كله عشان الحراره تكون مستقرة رغم ان الكثير يشوفون 108 طبيعيه ولكن بالواقع عاليه

أعرف بيجي كم واحد يقول منت أحسن من المصنع و هم حاطينها تشتغل كذا

أعطيكم المبررات عشان أختصر الموضوع

على 108 درجات لو تمسك خرطوش الموية تحصله محجر و حار مره ما تقدر تمسكه ثواني

لازم تمسك كرتون او فاين و تشوف تحجير الخرطوش و هنا يكون معرض للتلف أي وقت

الشيء الآخر نقص بماء الرديتر لان على 108 تكون أعلى من درجة غليان الماء

درجة غليان الماء 100 درجة و بالتالي تبخير بالماء و نقص كل فترة

الكثير يقول حط موية أصلية درجة غليانها توصل 120 درجة و اعلى شوي

ماهو كل الناس عنده إستطاعة يحط موية أصلية

بعض الناس حتى ما يحط موية عاديه صحة الجالون الكبير أبو 5 ريال تحصله مضطر

يحط موية من البزبوز عاديه يمشي حاله

و حتى لو حطيت موية أصلية تبقى مشكلة المكيف يقل تبريده مع الوقوف لأن المراوح تشتغل و تطفي

و يبقى الخرشوط محجر

و أغلب السيارات القير الاوتوماتيك يجي مبرد القير داخل رديتر الماء

يعني المكينه و ماء الرديتر تسخن بالتالي القير يسخن و يوصل فوق 100 درجة داخل المدينه

حتى لو سواقتك هاديه اجباري يوصل لهذا الرقم

الكلام هذا كله و التبريرات لأن فيه كم عضو بيجي يقول طيب ركب مبرد خارجي

المبرد الخارجي يكلف أقل شيء قيمته لحاله بدون تركيب 300 ريال أصغر نوع

و يحتاج مروحه خاصه يعني تركبه بدون مروحه راح يسخن القير عليك ولا تستفيد شيء

يعني يكلف تركيب المبرد مع المروحه و شغل اليد ما يقل عن 700 ريال

إذا انت تقدر عليها غيرك يبي أقل التكاليف

و من أسباب خلط زيت القير مع ماء الرديتر هو أنفجار المبرد الداخلي

و هذا بسبب الحراره فلا تجي تقول المصنع يعرفون وش يسوون

المصنع يصمم لك السيارة على اساس وهي جديده تتحمل كل شيء طبيعي

لكن بعد كم سنه خلاص لابد من العناية أكثر عشان تعيش معك اكثر

باللومينا كنت أفكر بطريقة ان المراوح تشتغل على حراره أقل ولا لقيت طريقة

الكهربائية بجده كل ما رحت لواحد قال ما تجي خلاص هي مصممه من بلدها كذا

بالقصيم لأنهم متعودين على الترهيم و شغل البر و توليف المراوح عند أول محل مراوح صلحها لي

ولكن بطريقة غبية وكنت مبسوط فيها

الشيء اللي يسويه يفصل وحده من المراوح من كمبيوتر و ضفيرة السيارة بشكل مستقل

يولف لها أسلاك خارجيه و كتاوت و شغلتها معقدة لدرجة لو فكيتها و رجعت تركبها بنفس الوقت

ما تعرف لازم ترجع لكهربائي فاهم يضبطها تجي 6 او 7 أسلاك معقدة

و عيبها انه كل اسبوعين ثلاثه أخر وصله بالسلك تقريبا 3 او 4 سم

مع كثر الحراره يصير السلك يابس و قاسي ولا يوصل حراره او ينقطع غالبا

تضطر تقص الرأس الزائد و ترجع توصل من جديد و هذا الحال بكل الاسلاك

يعني بالواقع كل يومين ثلاثه تفتح الكبوت و تجلس تعدل بالاسلاك كل يومين واحد خرب تقص الرأس

و تعدله و بعد يومين يخرب الثاني و حاله

و حتى لو ما خرب بحال تشغيل المروحه تشتغل على أقصى سرعه و تطفي المروحه الثانيه

يعني تبقى السيارة شغاله على مروحه وحده

بالعامية { صبها و ردها } ما كأنك سويت شيء

و اذا ولفت المروحتين و حطيتها بفاصل تحتاج اسلاك اكثر و تعقيد اكثر

و اذا شغلت المكيف و نسيتها دقيقه وحده يضرب الكمبروسر

و اذا نسيت تشغلها اي وقت تسخن السيارة عليك و راحت عليك المكينه

لانها تكون مفصوله بشكل كامل عن كهرباء السيارة

اللومينا لها معي حوالي 5 سنوات

حاليا الكابرس كم شهر ولا كنت ابي اللعب بالكهرباء لان نظافة الكابرس فرق كبير عن اللومينا

و تخليها شد بلد ما ينفع و لي كم شهر كل ما رحت لكهربائي قلت ابي المراوح تشتغل بفاصل

لكن تبقى نظام الوكالة شغال بحال نسيتها او عطيت السيارة أحد ما تسخن

اقلها ما ابي المراوح تشتغل على اعلى سرعة لان لو فصلتها تشتغل على اعلى سرعة

تضطر كل شوي تفصل و تشغل لانها تبرد المكينه و تنزل الحراره حتى توصل للسبعينات

و تكون بارده ابيها تشتغل على السرعة الاولى

لأن حتى نظام الوكالة توصل 108 او حتى مع المكيف تشتغل السرعة الاولى و تبرد طبيعي

لكن تشتغل من 108 الى 105 و تطفي ولا كأنك سويت شيء

عموما بعد تفكير و تفكير و افتح الكبوت و أجلس اطالع بالمكينه و الضفيرة وأحاول اولف الشغله

و الفترة الاخيرة دوامي مساءا الجو زين و فاضي اغلب الوقت اجلس اقلب على كيفي بالسيارة

لقيت حل سهل و موفر

{ اول ما كتبت الموضوع توقعت 6 او 7 سطور و ينتهي الموضوع لكن شكلنا مطولين }

شريت سلك 3 متر و فتحت الكبوت و السويتش و السيارة طافيه

وفيكت علبة الفيوز و ركزت على كتاوت المراوح

فيه يمين و يسار و السرعة الاولى و الثانيه يعني كم كتاوت كلها خاصه بالمراوح

بدأت ربطت السلك بالكهرباء الموجب و الطرف الثاني اوصله بكتاوت المروحه

وصلت بكل الكتاوت ما اشتغلت

لحول رجعت سكرت الكبوت و جلست شويات بالسيارة و أكلني الناموس و رجعت نزلت

و فتحت الكبوت مره ثانيه قلت أجرب طريقة ثانيه

ربطت السلك بالكهرباء السالب و نفس الطريقة بدأت اوصلها بالكتاوت

الا اسمع صوت المراوح يا سلام حسيت انهم نزلوا لي راتب أضافي ههههههههههه

بغيت أتصل على غينيس مدري وش اسمهم حقيت الأرقام القياسية و براءة الاختراع بس ما اعرف رقمهم

المهم تأكدت من المراوح كلها شغاله على السرعة الاولى بصوت هادي

جربت على باقي الكتاوت واحد منهم يشغل مروحة المكيف على السرعة العاليه

قلت خلني على السرعة الاولى تكفي بالراحه لتبريد المكيف و المكينه بشكل كامل

من بكرة شريت فاصل و دخلت السيارة بحوش البيت و جبت الدريل عشان اثبت الفاصل

تحت بالديكور تحت الدركسون بشكل ما يكون بارز و ضبطت الامور

الفرق بين طريقتي و طريقة الكهربائية

طريقة الكهربائية 7 اسلاك و كتاوت و شغله معقدة و تشتغل على اعلى سرعة

ولو نسيت تشغل المراوح راحت عليك المكينه

طريقتي حتى لو نسيتها يبقى نظام الوكالة شغال متى ما وصلت للحد المبرمجه عليه من الوكالة

تشتغل المراوح يعني مافيه خوف أبدا و الشيء الاخر

المراوح لانها على السرعة الهاديه و بدون توليف كتاوت خارجي السلك ما يتلف

يبقى جديد الموضوع حاليا له شهر من سويتها لا خرب السلك ولا شيء و فكيته أتأكد لين ما كأنه استخدم

يعني طريقة تعيش معك سنوات بدون خوف

و المكيف يبقى بارد معك واقف ماشي يبقى بارد

تبي تطلع عقبات و مرتفعات تشغل المروحه و تبقى شغاله حتى لو الحراره 90 او اقل

يعني اي وقت حتى لو السيارة طافيه تقدر تشغل المروحه

يعني حتى بالعقبات ما تسخن عليك السيارة ولا تخاف

الطريقة هذي لجميع السيارات ماهو فقط للكابرس واللومينا

حتى الكوري و الياباني كامري يارس كورولا اكسنت سوناتا كل السيارات تنفع لها

التكلفه اجماليه السلك سعره تقريبا 6 ريال كل متر بريالين

الفاصل قيمته 10 ريال

ولو بالصيف و بغيت المروح تشتغل على طول يكفيك سلك 15 سم توصله من الكتاوت الاصليه للسيارة

الى اقرب نقطة سالب بالسيارة بدون فاصل ولا شيء يكون شغال مع السلف

{ جيت أعد سطور الموضوع وصلت 20 و تعبت و تلخبطت عيوني الموضوع فعلا طويل }

والله كله من الصور لو كان خاصية الصور موجوده كان اختصرت الموضوع بكم صورة و خلاص

الموضوع فعلا طويل ولكن يفيد كثير من الناس و بالتوفيق

إبلاغ

الردود